Soliqqa oid savol-javoblar

Hovlida etishtirilgan qulupunayni sotishdan soliq to‘lanadimi?

Uy xo‘jaligida, shu jumladan dehqon xo‘jaligida etishtirilgan dehqonchilik mahsulotlarini tabiiy yoki qayta ishlangan holda sotishdan olingan daromadga jismoniy shaxslardan olinadigan daromad solig‘i solinmaydi.

Shu sababli o‘z hovlisida etishtirilgan qulupunayni sotgan jismoniy shaxs ushbu daromaddan 12 foizlik daromad solig‘ini to‘lamaydi.

Muhim: sanoat usulida qayta ishlangan mahsulotlar hamda manzarali bog‘dorchilik va gulchilik mahsulotlari uchun mazkur imtiyoz qo‘llanilmaydi.

Baliq xo‘jaligi uchun 0 foizlik foyda solig‘i nimani anglatadi?

Baliq xo‘jaligi korxonasi o‘zi etishtirgan baliq mahsulotlarini sotishdan olgan daromadi jami daromadining 90 foizidan ko‘prog‘ini tashkil etsa, foyda solig‘ining 0 foizlik stavkasini qo‘llashi mumkin.

Bu soliqdan ozod etilish bilan bir xil emas. Korxona:

soliq hisobini yuritishi;
soliq bazasini aniqlashi;
hisobotni belgilangan muddatda topshirishi shart.

Faqat hisoblangan foyda solig‘i summasi 0 foizlik stavka sababli nolga teng bo‘ladi.

Yakka tartibdagi tadbirkor bir nechta faoliyat bilan shug‘ullansa qanday soliq to‘laydi?

Yakka tartibdagi tadbirkorning har bir faoliyat turi uchun alohida qat’iy belgilangan soliq to‘lashi haqidagi eski tartib amalda qo‘llanilmaydi.

2026-yilda soliq majburiyati tadbirkor:

qaysi soliq rejimida ekani;
yillik daromadi;
amalga oshirayotgan faoliyat turlari;
ayrim faoliyatlar uchun belgilangan maxsus stavkalarga qarab aniqlanadi.

Turli soliq stavkasi yoki soliq solish ob’ekti belgilangan faoliyatlar bo‘lsa, ular bo‘yicha alohida hisob yuritilishi kerak.

E’tibor bering: ro‘yxatdan o‘tkazilmagan faoliyat turi bilan shug‘ullanishdan oldin uni davlat ro‘yxati ma’lumotlariga kiritish lozim.

Pensioner mol-mulk solig‘idan ozod etiladimi?

Pensionerning mulkidagi yashash uchun mo‘ljallangan ko‘chmas mulk 60 kv. metr maydon doirasida mol-mulk solig‘idan ozod qilinadi.

Agar uy yoki kvartira maydoni 60 kv. metrdan katta bo‘lsa, soliq faqat ortiqcha maydon uchun hisoblanadi.

Masalan: kvartira 80 kv. metr bo‘lsa, 60 kv. metriga imtiyoz beriladi, qolgan 20 kv. metr uchun soliq to‘lanadi.

Imtiyoz pensionerning tanloviga ko‘ra faqat bitta turar joy ob’ektiga tatbiq etiladi. Imtiyoz huquqini tasdiqlovchi ma’lumotlar soliq organiga taqdim etilishi lozim.

Kasallik nafaqasidan daromad solig‘i ushlanadimi?

Vaqtincha mehnatga layoqatsizlik nafaqasi soliq solinmaydigan davlat nafaqalari qatoriga kirmaydi.

Shu sababli kasallik varaqasi asosida to‘langan nafaqa jismoniy shaxsning soliq solinadigan daromadiga kiritiladi va undan 12 foizlik daromad solig‘i ushlab qolinadi.

Normativ hujjatlar

O‘zbekiston Respublikasining Soliq kodeksi

Maqola foydali bo‘ldimi?

Bo‘limlar