Hujjatlarni konsullik legallashtirish

Konsullik legallashtirish nima?

Konsullik legallashtirish — bir davlatda rasmiylashtirilgan hujjatdan boshqa davlatda foydalanish uchun uning:

imzosi haqiqiyligini;
hujjatni imzolagan shaxs vakolatini;
muhr yoki shtamp haqiqiyligini;
qonunchilikka muvofiqligini tasdiqlash tartibidir.

Legallashtirish hujjatda bayon etilgan ma’lumot va faktlarning to‘g‘riligini tasdiqlamaydi.

Konsullik legallashtirish — xorijiy hujjatni boshqa davlatda rasmiy tan olish uchun tasdiqlash tartibi.

Apostilь — Gaaga konventsiyasi ishtirokchisi bo‘lgan davlatlar o‘rtasida konsullik legallashtirishi o‘rnini bosuvchi maxsus tasdiq.

Konsullik okrugi — muayyan konsullik muassasasi xizmat ko‘rsatadigan hudud.

Qachon legallashtirish talab qilinmaydi?

Agar hujjat:

Gaaga konventsiyasi qo‘llaniladigan davlatda apostilь bilan tasdiqlangan bo‘lsa;
O‘zbekistonning xalqaro shartnomasiga ko‘ra legallashtirishsiz qabul qilinsa,

konsullik legallashtirishi talab etilmaydi.

Muhim: hujjat berilgan davlat bilan O‘zbekiston o‘rtasida apostilь yoki hujjatlarni o‘zaro tan olish tartibi amal qilishini oldindan tekshirish lozim.

Qanday hujjatlar taqdim etiladi?

Konsullik muassasasiga:

belgilangan shakldagi ariza;
shaxsni tasdiqlovchi hujjat nusxasi;
legallashtiriladigan hujjat va uning nusxalari;
konsullik yig‘imi va haqiqiy xarajatlar to‘langanini tasdiqlovchi hujjat taqdim etiladi.

Zarur hollarda konsul hujjatning o‘zbek yoki boshqa tildagi notarial tasdiqlangan tarjimasini talab qilishi mumkin.

Ko‘rib chiqish muddati

Hujjatlar ariza berilgan kundan e’tiboran 5 ish kuni ichida legallashtiriladi.

Hujjatning haqiqiyligi yoki qonunchilikka muvofiqligi bo‘yicha shubha tug‘ilsa, konsul tegishli davlat organlaridan qo‘shimcha ma’lumot so‘raydi.