Savol-javoblar

Hamkorlikdan asosiy maqsad nima?

O‘zbekistonning xorijda istiqomat qilayotgan vatandoshlar bilan hamkorlik sohasidagi davlat siyosati quyidagilarga qaratilgan:

vatandoshlarning huquq va erkinliklarini himoya qilishga ko‘maklashish;
o‘zbek tili, madaniyati, an’analari hamda ilmiy va ma’naviy merosini saqlash va targ‘ib qilish;
vatandoshlarning O‘zbekistonda ta’lim olish imkoniyatlarini kengaytirish;
ularning bilim, tajriba va salohiyatini mamlakat rivojiga jalb etish;
vatandoshlar va ularning tashkilotlari bilan aloqalarni mustahkamlash.

Davlat siyosati kontseptsiyasi — muayyan sohadagi maqsadlar, printsiplar, asosiy yo‘nalishlar va amalga oshirish mexanizmlarini belgilaydigan qarashlar tizimi.

Vatandoshlar bilan hamkorlik — xorijdagi vatandoshlar va ularning tashkilotlari bilan madaniy, ilmiy, ta’limiy, iqtisodiy va boshqa sohalarda aloqalarni rivojlantirish.

Hamkorlik qaysi yo‘nalishlarda amalga oshiriladi?

Asosiy yo‘nalishlar quyidagilardan iborat:

ilmiy, ta’lim, tibbiyot, madaniyat, ma’rifat va sport sohalarida qo‘shma loyihalarni amalga oshirish;
vatandoshlarning ta’lim olishi va malakasini oshirishga ko‘maklashish;
o‘zbek tili, madaniyati va urf-odatlarini saqlash hamda yosh avlodga etkazishni qo‘llab-quvvatlash;
axborot almashinuvi va ommaviy axborot vositalari sohasidagi hamkorlikni kengaytirish;
xorijda tahsil olayotgan O‘zbekiston fuqarolari bilan aloqani saqlash va ularning O‘zbekistonda ishga joylashishiga ko‘maklashish;
vatandoshlarni tadbirkorlik, investitsiya, innovatsiya va ilmiy loyihalarga jalb etish.

Tarixiy Vatan — shaxsning kelib chiqishi, tili, madaniyati yoki tarixiy ildizlari bilan bog‘liq mamlakat.

Qanday qo‘llab-quvvatlash choralari berilishi mumkin?

Hamkorlikning darajasi va shakliga qarab, qonunchilik asosida vatandoshlarga quyidagi ko‘maklar ko‘rsatilishi mumkin:

ko‘p martalik va uzoq muddatli vizalarni soddalashtirilgan tartibda rasmiylashtirish;
vaqtincha yashash va mehnat faoliyati bilan shug‘ullanish uchun ruxsat olishga ko‘maklashish;
yuqori malakali mutaxassislarni O‘zbekistonda ishga jalb qilish;
ijtimoiy va maishiy masalalarni hal etishga yordam berish;
tadbirkorlik, ilmiy, ma’rifiy va innovatsion loyihalar uchun ob’ektlar yoki er maydonlari ajratish;
o‘qish, ish va ayrim ijtimoiy xarajatlarni to‘liq yoki qisman moliyalashtirish;
ayrim ta’lim yo‘nalishlari bo‘yicha grantlar ajratish;
munosib hissa qo‘shgan vatandoshlarni davlat mukofotlari va faxriy unvonlar bilan taqdirlash.

Muhim: mazkur choralar har bir vatandoshga avtomatik ravishda berilmaydi. Ularni qo‘llash tegishli davlat organining qarori, hamkorlik shakli va amaldagi qonunchilik talablariga bog‘liq.