Nogironligi bo‘lgan yoshlarning o‘qish, yashash va transport xarajatlarini qoplash

Kimlar subsidiya olishi mumkin?

Subsidiyaga 14 yoshga to‘lgan va 31 yoshga to‘lmagan nogironligi bo‘lgan shaxslar murojaat qilishi mumkin.

Ushbu huquq:

O‘zbekiston Respublikasi fuqarolariga;
O‘zbekistonda yashash guvohnomasiga ega chet el fuqarolariga;
fuqaroligi bo‘lmagan shaxslarga tatbiq etiladi.

16 yoshga to‘lmagan shaxs nomidan uning qonuniy vakili murojaat qiladi.

Qaysi yo‘nalishlarda o‘qish uchun beriladi?

Subsidiya nodavlat ta’lim tashkilotlarida:

kasb-hunar va kasbiy ko‘nikmalarni o‘rganish;
axborot texnologiyalari va kompьyuter dasturlash;
umumta’lim fanlari;
xorijiy tillarni o‘rganish xarajatlarini qoplash uchun ajratiladi.

Subsidiya faqat bitta o‘quv kursi uchun va ko‘pi bilan 12 oyga beriladi.

Subsidiya miqdori

O‘qish xarajatlari uchun har oy:

kasb-hunar, kasbiy ko‘nikma, axborot texnologiyalari va dasturlashga — 5 BHMgacha;
umumta’lim fanlariga — 3 BHMgacha;
xorijiy tillarga — 3 BHMgacha subsidiya ajratiladi.

O‘qish, yashash va transport xarajatlari uchun bir nafar shaxsga ajratiladigan umumiy subsidiya 50 BHMdan oshmasligi kerak.

Yashash va transport xarajatlari

Yashash va transport xarajatlari faqat o‘qish xarajatlari uchun subsidiya tayinlangan shaxslarga qoplab beriladi.

Transport xarajatlari uchun subsidiya har bir kilometrga BHMning 0,2 foizidan oshmagan miqdorda hisoblanadi.

Yashash xarajatlarini qoplash uchun ijara shartnomasi soliq organlarida hisobga qo‘yilgan bo‘lishi kerak. Ijaradagi uy nodavlat ta’lim tashkiloti joylashgan tuman yoki shahar hududida bo‘lishi lozim. Toshkent shahri bundan mustasno.

Qanday murojaat qilinadi?

Ariza:

istalgan Davlat xizmatlari markazi;
yoki Yagona interaktiv davlat xizmatlari portali orqali beriladi.

Davlat xizmati bepul ko‘rsatiladi. Nogironlik to‘g‘risidagi ma’lumotlar davlat axborot tizimlaridan elektron shaklda olinadi.

Yashash va transport xarajatlari uchun ariza o‘qish boshlanganidan keyin har oy yakuni bo‘yicha taqdim etiladi. Unga yo‘l xarajatlarini tasdiqlovchi hujjatlar va zarur holda ijara shartnomasi ilova qilinadi.

Subsidiya qanday to‘lanadi?

O‘qish xarajatlari uchun subsidiya nodavlat ta’lim tashkilotining hisobvarag‘iga o‘tkaziladi.

Yashash va transport xarajatlari uchun subsidiya esa ariza beruvchining bank kartasiga o‘tkaziladi.

Mahalladagi yoshlar etakchisi shaxsning o‘qishi, ijara manzilida yashashi va transportdan foydalanishini monitoring qiladi.

Muhim shart

Subsidiya ajratish haqida SMS-xabarnoma olgan shaxs 90 kun ichida nodavlat ta’lim tashkiloti bilan tuzilgan shartnomani taqdim etishi va o‘qishni boshlashi kerak. Aks holda subsidiya ajratish rad etiladi.

Normativ hujjatlar

O‘zbekiston Respublikasi Vazirlar Mahkamasining 2022-yil 21-iyundagi 341-son qarori