Rossiyada ishlash uchun patent olish

Patent nima?

Patent — Rossiyaga vizasiz tartibda kirgan chet el fuqarosiga jismoniy yoki yuridik shaxsda qonuniy ishlash huquqini beruvchi hujjat.

Mehnat patenti — chet el fuqarosining Rossiyada haq to‘lanadigan mehnat faoliyatini amalga oshirish huquqini tasdiqlovchi hujjat.

Avans to‘lovi — patent amal qilishi uchun oldindan to‘lanadigan jismoniy shaxslar daromad solig‘i.

Rossiya Federatsiyasi sub’ekti — patent amal qiladigan respublika, o‘lka, viloyat yoki federal ahamiyatdagi shahar.

Qachon murojaat qilish kerak?

Rossiyaga ishlash maqsadida kirgan fuqaro migratsiya kartasida kirish maqsadini «Ish» deb ko‘rsatishi kerak.

Patent olish uchun Rossiyaga kirgan kundan boshlab 30 kalendarь kun ichida Rossiya Ichki ishlar vazirligining hududiy migratsiya organiga murojaat qilinadi.

30 kunlik muddat o‘tkazib yuborilsa, hujjatlar bilan birga ma’muriy jarima to‘langanini tasdiqlovchi hujjat ham talab qilinishi mumkin.

Qanday hujjatlar kerak?

Qoida tariqasida:

patent berish to‘g‘risidagi ariza;
amaldagi pasport;
«Ish» maqsadi ko‘rsatilgan migratsiya kartasi;
turgan joy bo‘yicha migratsiya hisobi;
tibbiy sug‘urta polisi yoki tibbiy xizmat ko‘rsatish shartnomasi;
tibbiy ko‘rik natijalari;
rus tili, Rossiya tarixi va qonunchiligi bo‘yicha bilimni tasdiqlovchi hujjat;
avans to‘lovi amalga oshirilganini tasdiqlovchi hujjat taqdim etiladi.

Patent qancha muddatga beriladi?

Patent 1 oydan 12 oygacha beriladi.

Uning amal qilish muddati to‘langan avans to‘lovi davriga qarab uzaytiriladi. Keyingi davr uchun to‘lov o‘z vaqtida amalga oshirilmasa, patentning amal qilishi to‘xtaydi.

Birinchi 12 oy tugagach, patent belgilangan tartibda qayta rasmiylashtirilishi mumkin.

Ish boshlagandan keyingi majburiyat

Patent berilganidan keyin chet el fuqarosi mehnat yoki fuqarolik-huquqiy shartnoma tuzishi kerak.

Shartnoma tuzilgani haqidagi xabarnoma va shartnoma nusxasi patent bergan migratsiya organiga qonunda belgilangan tartibda yuboriladi.

Muhim: patent berilganidan keyin 2 oy ichida mehnat faoliyati haqida xabar berilmasa, patent bekor qilinishi mumkin.

Patent qaerda amal qiladi?

Fuqaro, qoida tariqasida:

patent berilgan Rossiya hududida;
patentda kasb yoki lavozim ko‘rsatilgan bo‘lsa, faqat shu faoliyat bo‘yicha ishlashi mumkin.

Ayrim qo‘shni hududlar o‘rtasida maxsus kelishuv mavjud bo‘lsa, bir hududda olingan patent asosida boshqa belgilangan hududda ham ishlashga ruxsat berilishi mumkin.

Qoida buzilsa

Quyidagilar ma’muriy javobgarlikka sabab bo‘lishi mumkin:

patentsiz ishlash;
avans to‘lovini kechiktirish;
ruxsat berilmagan hudud yoki kasb bo‘yicha ishlash;
migratsiya hisobi va Rossiyada bo‘lish muddatini buzish.

Javobgarlik jarima, Rossiyadan chiqarib yuborish va keyinchalik kirishga taqiq qo‘yilishini qamrab olishi mumkin.

Normativ hujjatlar

Rossiya Federatsiyasining «Chet el fuqarolarining huquqiy holati to‘g‘risida»gi 115-FZ-son Federal qonuni

Rossiya Ichki ishlar vazirligi