Дори воситалари билан таъминлаш бўйича имтиёзлар

Кимлар бепул дори воситалари олиши мумкин?

Амбулатория шароитида даволанаётган айрим беморлар ва фуқаролар тоифалари шифокор рецепти бўйича дори воситаларини бепул олиш ҳуқуқига эга.

Бундай имтиёз қуйидагиларга татбиқ этилади:

онкологик касалликларга чалинган беморлар;
сил касаллигига чалинган беморлар;
мохов касаллигига чалинган беморлар;
эндокринологик касалликларга — қандли диабет ва қандсиз диабетга чалинган беморлар;
руҳий касалликларга чалинган беморлар;
ОИВ инфекциясига чалинган шахслар;
юрак клапанлари протезланган ва аъзолари кўчириб ўтказилган беморлар;
дастурли гемодиализ олаётган беморлар;
ўзгалар парваришига муҳтож ёлғиз пенсионерлар;
1941–1945 йиллардаги уруш ногиронлари ва қатнашчилари, шунингдек уларга тенглаштирилган шахслар;
1941–1945 йиллардаги меҳнат фронти қатнашчилари;
Чернобиль АЭС ҳалокати оқибатларини бартараф этишда қатнашиб ногирон бўлган шахслар;
байналмилалчи жангчилар;
ядро полигонлари ва бошқа радиация-ядро объектларида ҳарбий хизматни ўтаган пенсия ёшидаги шахслар.

Бепул дори қандай берилади?

Имтиёзли дори воситалари даволовчи шифокор тайинлови асосида берилади. Бемор дори воситасини у бириктирилган амбулатория-поликлиника муассасасидан ёки белгиланган дорихона орқали олиши мумкин.

Муайян касаллик ёки имтиёзли тоифа учун бепул бериладиган дори воситалари Соғлиқни сақлаш вазирлиги ва ваколатли органлар томонидан тасдиқланган рўйхат асосида белгиланади.

Агар зарур дори тиббиёт муассасасида мавжуд бўлмаса, беморга уни дорихонадан бепул олиш учун белгиланган тартибда рецепт расмийлаштирилади.

Рецепт олиш учун нима керак?

Бемор ўзи бириктирилган ёки яшаш жойидаги тиббиёт муассасасига мурожаат қилиб, имтиёзга бўлган ҳуқуқини тасдиқловчи ҳужжатни тақдим этади.

Дори воситаси, одатда, бир даволаш курси учун зарур миқдорда тайинланади. Айрим касалликларда препаратни тайинлаш учун тегишли тор мутахассис — масалан, эндокринолог, онколог, психиатр, инфекционист ёки фтизиатр тавсияси талаб қилиниши мумкин.

Имтиёзли рецепт берилган кундан бошлаб 1 ой давомида амал қилади. Шу муддат ичида рецепт бўйича дори воситасини олиш керак.