ID-картани алмаштириш

ID-карта қачон алмаштирилади?

Ўзбекистон фуқаросининг ID-картаси қуйидаги ҳолларда алмаштирилади:

амал қилиш муддати тугаганда;
фамилияси, исми ёки ота исми ўзгарганда;
туғилган санаси, жинси ёки миллати ўзгарганда;
ID-картадаги маълумотларда хато ёки ноаниқлик аниқланганда;
ID-карта ёки унинг электрон чипи яроқсиз ҳолга келганда;
ID-карта йўқолганда;
ҳужжат ашёвий далил сифатида олиб қўйилганда.

ID-картани алмаштириш — аввалги ҳужжат ўрнига янги ID-картани расмийлаштириш жараёни.

Маълумотларни йиғиш пункти — ички ишлар органининг миграция ва фуқароликни расмийлаштириш бўлинмаси ёки Давлат хизматлари маркази.

Электрон чип — ID-карта эгасининг биографик ва биометрик маълумотлари сақланадиган электрон қурилма.

Қачон мурожаат қилиш керак?

Фуқаро:

ID-картанинг амал қилиш муддати тугаганда;
тегишли ёшга тўлганда;
фамилияси, исми, ота исми, туғилган йили ёки миллати ўзгарганда

бир ой ичида янги ID-карта олиш учун мурожаат қилиши керак.

ID-карта йўқолган тақдирда маълумотларни йиғиш пунктига имкон қадар тез мурожаат қилиш лозим.

Қаерга мурожаат қилинади?

Фуқаро ўзига қулай бўлган:

ички ишлар органининг миграция ва фуқароликни расмийлаштириш бўлинмасига;
Давлат хизматлари марказига мурожаат қилиши мумкин.

Мурожаат яшаш жойидан қатъи назар, экстерриториал тартибда берилиши мумкин.

Қандай ҳужжатлар керак?

Қуйидагилар тақдим этилади:

белгиланган шаклдаги ариза-анкета;
аввал берилган паспорт ёки ID-карта;
шахсий маълумотлар ўзгарган бўлса, буни тасдиқловчи ҳужжат;
ID-карта ашёвий далил сифатида олиб қўйилган бўлса, ваколатли орган қарори;
давлат божи тўланганлиги ҳақидаги маълумот.

Электрон тўлов амалга оширилганда қоғоз квитанцияни тақдим этиш талаб қилинмайди.

ID-карта қанча вақтда берилади?

Ҳужжатлар тўлиқ қабул қилинганидан кейин янги ID-карта 1 иш куни ичида берилади.

ID-карта йўқолганда ҳам янги ҳужжат ариза келиб тушган кундан бошлаб 1 иш куни ичида расмийлаштирилади.

Қачон бепул алмаштирилади?

Агар ID-картадаги техник нуқсон маълумотларни йиғиш пунктининг айби билан юзага келган бўлса, ҳужжат бепул алмаштирилади.

Бошқа ҳолатларда ID-карта бериш учун, қоида тариқасида, БҲМнинг 89 фоизи миқдорида давлат божи ундирилади.

Миллат ҳақидаги маълумотни ўзгартириш мумкинми?

Агар ота-она турли миллатга мансуб бўлса, биринчи марта ID-карта расмийлаштирилаётганда фуқаронинг хоҳишига кўра отаси ёки онасининг миллати киритилади.

Кейинчалик бу маълумот фуқаронинг ёзма аризаси асосида фақат бир марта, отаси ёки онасининг миллатига ўзгартирилиши мумкин.

Муҳим: ID-карта Ўзбекистон ҳудудида шахсни тасдиқлайди. Хорижга чиқиш учун биометрик хорижга чиқиш паспорти талаб этилади.

Норматив ҳужжатлар

Ўзбекистон Республикаси Президентининг 2020 йил 22 сентябрдаги ПФ-6065-сон Фармони

«Давлат божи тўғрисида»ги Қонун