Bakalavriatga qabul qilish: asosiy qoidalar

Kimlar bakalavriatga hujjat topshirishi mumkin

Bakalavriatga:

— 11 yillik umumiy o‘rta ta’limni tamomlaganlar;

— o‘rta maxsus ta’limni tamomlaganlar;

— boshlang‘ich kasbiy ta’lim olganlar;

— 2020-yil 24-sentabrga qadar amal qilgan tizim bo‘yicha o‘rta maxsus yoki kasb-hunar ta’limi haqida tegishli hujjatga ega shaxslar hujjat topshirishi mumkin.

Qabul davlat granti va to‘lov-kontrakt asosida tanlov va to‘plangan ballar reytingi bo‘yicha amalga oshiriladi.

Ro‘yxatdan o‘tish

Qabul ikki bosqichda o‘tkaziladi.

Birinchi bosqichda — 5-iyundan 25-iyunga qadar abiturient YaIDXP yoki Bilim va malakalarni baholash agentligining elektron tizimi orqali ro‘yxatdan o‘tadi va:

— fanlar majmuasini;

— ta’lim tilini;

— test topshirish hududini;

— kasbiy yoki ijodiy imtihon bo‘lsa, uni o‘tkazadigan OTMni tanlaydi.

Ikkinchi bosqichda, barcha test sinovlari tugagach, abiturientga 15 kun davomida OTM, bakalavriat yo‘nalishi, ta’lim shakli va tanlov ustuvorligini tanlash imkoniyati beriladi.

Bir xil fanlar majmuasi va ketma-ketligiga mos 5 tagacha bakalavriat yo‘nalishi va ta’lim shaklini tanlash mumkin.

Tanlov ustuvorligi — abiturient tanlagan yo‘nalishlar bo‘yicha tanlov qanday navbatda amalga oshirilishini belgilaydigan mezon.

Kirish imtihonlari

Kirish sinovlari ikki qismdan iborat:

— barcha abiturientlar uchun majburiy ona tili, matematika va O‘zbekiston tarixi;

— tanlangan yo‘nalishga mos ikkita fan yoki tegishli kasbiy (ijodiy) imtihon.

Ayrim yo‘nalishlarda test bilan birga kasbiy, ijodiy yoki IQ sinovi ham o‘tkazilishi mumkin.

Test sinovlari, qoida tariqasida, iyulь–avgust oylarida o‘tkaziladi. Aniq sanalar har yili Davlat komissiyasi tomonidan belgilanadi.

Xorijiy til sertifikati

Agar fanlar majmuasida xorijiy til birinchi fan bo‘lsa, abiturientda kamida B1 darajadagi milliy yoki xalqaro tan olingan sertifikat bo‘lishi shart.

Xorijiy til fanlar majmuasiga kiritilgan boshqa yo‘nalishlarda:

— B1 sertifikat uchun — ushbu fandan maksimal ballning 75 foizi;

— B2 va undan yuqori sertifikat uchun — maksimal ball beriladi.

Test uchun to‘lov

Test sinovida ishtirok etish uchun, qoida tariqasida, BHMning 50 foizi miqdorida to‘lov undiriladi.

Quyidagilardan to‘lov olinmaydi:

— joriy yil bitiruvchilari;

— I va II guruh nogironligi bo‘lgan shaxslar va nogironligi bo‘lgan bolalar;

— to‘liq davlat ta’minotidagi shaxslar;

— Ijtimoiy reestrga kiritilgan shaxslar va ularning farzandlari;

— «Yoshlar daftari»ga kiritilgan yoshlar.

Ayrim pedagoglar va davlat tibbiyot muassasalarida ishlovchi tibbiyot hamda farmatsevtika xodimlaridan belgilangan yig‘imning 50 foizi undiriladi.

BHM — qonunchilikda belgilangan to‘lovlar, yig‘imlar va boshqa miqdorlarni hisoblashda qo‘llaniladigan bazaviy hisoblash miqdori.

Natijalar

Abiturientning testda to‘plagan bali test o‘tkazilgan kunning ertasiga e’lon qilinadi.

Talabalikka tavsiya etilgan yoki etilmagani haqidagi yakuniy tanlov natijasi ikkinchi bosqich to‘liq yakunlanganidan keyin bir hafta ichida Bilim va malakalarni baholash agentligining rasmiy tizimida e’lon qilinadi.

Normativ hujjatlar

O‘zbekiston Respublikasi Vazirlar Mahkamasining qarori, 13.09.2025-yildagi 578-son