Ijtimoiy sheriklik nima?

Ijtimoiy sheriklik deganda nima tushuniladi?

Ijtimoiy sheriklik — davlat organlarining fuqarolik jamiyati institutlari bilan mamlakatni ijtimoiy-iqtisodiy rivojlantirish dasturlarini, normativ-huquqiy hujjatlarni hamda fuqarolarning huquqlari va qonuniy manfaatlariga daxldor boshqa qarorlarni ishlab chiqish va amalga oshirishdagi hamkorligi.

Fuqarolik jamiyati institutlariga, jumladan:

jamoat birlashmalari;
boshqa nodavlat notijorat tashkilotlari;
fuqarolarning o‘zini o‘zi boshqarish organlari;
ommaviy axborot vositalari kiradi.

Ijtimoiy sheriklik sub’ektlari kimlar?

Ijtimoiy sheriklik sub’ektlari:

davlat organlari;
fuqarolik jamiyati institutlari.

Ular qonunchilikda belgilangan shakllarda o‘zaro hamkorlik qiladi.

Ijtimoiy sheriklik qaysi sohalarda amalga oshiriladi?

Ijtimoiy sheriklik, jumladan:

aholini ijtimoiy muhofaza qilish;
bandlik, kichik biznes va xususiy tadbirkorlikni rivojlantirish;
atrof-muhit va aholi sog‘lig‘ini muhofaza qilish;
sog‘lom turmush tarzini qaror toptirish;
ta’lim, fan, madaniyat va sport;
yoshlar, xotin-qizlar, onalik va bolalikni qo‘llab-quvvatlash;
huquqiy bilim va huquqiy madaniyatni yuksaltirish;
fuqarolik jamiyati va demokratik huquqiy davlat asoslarini mustahkamlash;
millatlararo, madaniyatlararo va fuqarolar totuvligini ta’minlash;
iste’molchilar huquqlarini himoya qilish;
korruptsiyaga nisbatan murosasiz munosabatni shakllantirish kabi sohalarda amalga oshirilishi mumkin.

Qonunchilikka muvofiq boshqa sohalarda ham ijtimoiy sheriklik amalga oshirilishi mumkin.

Ijtimoiy sheriklik qanday shakllarda amalga oshiriladi?

Asosiy shakllarga:

ijtimoiy-iqtisodiy rivojlantirish dasturlarini ishlab chiqish va amalga oshirishda ishtirok etish;
normativ-huquqiy hujjatlarni ishlab chiqish va amalga oshirishda ishtirok etish;
davlat organlari huzuridagi ishchi guruhlar, komissiyalar va jamoatchilik-maslahat organlarida ishtirok etish;
qo‘shma tadbirlar o‘tkazish, maslahatlashuv va muzokaralar olib borish;
bitimlar va shartnomalar tuzish, qo‘shma loyiha va rejalar ishlab chiqish;
o‘zaro axborot almashish va qo‘llab-quvvatlash kiradi.

O‘zbekiston Respublikasining Qonuni, 25.09.2014-yildagi O‘RQ-376-son