Korruptsiyaga qarshi kurashishda faol ishtirok etish nima?

Korruptsiyaga qarshi kurashishda faol ishtirok etish:

• tayyorgarlik ko‘rilayotgan, sodir etilayotgan yoki sodir etilgan korruptsiyaga oid huquqbuzarlik haqida xabar berish;
• korruptsiyaga oid jinoyat sodir etganligi uchun qidiruv e’lon qilingan shaxsni topishga yordam berishdan iborat.

Korruptsiyaga oid jinoyatni tergov qilish va fosh etish uchun ahamiyatli dalillar haqida xabar berish yoki tergov va tezkor-qidiruv tadbirlariga bevosita ko‘maklashish ham korruptsiyaga qarshi kurashishga ko‘maklashish hisoblanadi.

Qanday holatlarda pul mukofoti beriladi?

Bir martalik pul mukofoti, jumladan, quyidagi holatlarda beriladi:

• fuqaroning o‘ziga nisbatan pora talab qilgan shaxs haqidagi xabari asosida huquqbuzarlik fosh etilganda;
• shaxsga ma’lum bo‘lgan korruptsiyaga oid huquqbuzarlik uning xabari asosida fosh etilganda;
• tashkilot yoki davlat organi xodimining unga pora taklif qilgan yoki pora talab qilgan shaxs haqidagi xabari asosida huquqbuzarlik fosh etilganda;
• korruptsiyaga oid jinoyat uchun qidiruvda bo‘lgan shaxs berilgan xabar asosida ushlanganda.

Ma’muriy huquqbuzarlik haqidagi xabar uchun mukofot

Korruptsiyaga oid ma’muriy huquqbuzarlik haqida berilgan xabar uchun:

• Ma’muriy javobgarlik to‘g‘risidagi kodeksning 61¹, 193¹ va 193²-moddalaridagi huquqbuzarliklar bo‘yicha — BHMning 3 baravari;
• Kodeksning 193⁴-moddasidagi huquqbuzarlik bo‘yicha — undirilgan jarimaning 50 foizi miqdorida bir martalik pul mukofoti beriladi.

Pora yoki zarar miqdori BHMning 30 baravarigacha bo‘lsa

Pora summasi, etkazilgan zarar yoki o‘zlashtirilgan mol-mulk qiymati BHMning 30 baravarigacha bo‘lganda:

• ijtimoiy xavfi katta bo‘lmagan jinoyat uchun — BHMning 5 baravari;
• uncha og‘ir bo‘lmagan jinoyat uchun — BHMning 7 baravari;
• og‘ir jinoyat uchun — BHMning 10 baravari;
• o‘ta og‘ir jinoyat uchun — BHMning 15 baravari miqdorida mukofot beriladi.

Pora yoki zarar miqdori BHMning 30 baravaridan 100 baravarigacha bo‘lsa

Pora summasi, etkazilgan zarar yoki o‘zlashtirilgan mol-mulk qiymati BHMning 30 baravaridan 100 baravarigacha bo‘lganda:

• ijtimoiy xavfi katta bo‘lmagan jinoyat uchun — BHMning 10 baravari;
• uncha og‘ir bo‘lmagan jinoyat uchun — BHMning 15 baravari;
• og‘ir jinoyat uchun — BHMning 20 baravari;
• o‘ta og‘ir jinoyat uchun — BHMning 25 baravari miqdorida mukofot beriladi.

Pora yoki zarar miqdori BHMning 100 baravaridan ko‘p bo‘lsa

Pora summasi, etkazilgan zarar yoki o‘zlashtirilgan mol-mulk qiymati BHMning 100 baravaridan ko‘p bo‘lganda mukofot:

• ancha miqdor uchun — tegishli summaning 15 foizi;
• ko‘p yoki juda ko‘p miqdor uchun — tegishli summaning 10 foizi miqdorida hisoblanadi.

Foiz bo‘yicha hisoblashda qonunchilikda tegishli toifa uchun belgilangan miqdorning eng kam chegarasi asos qilib olinadi.

Qidiruvdagi shaxs haqida xabar uchun mukofot

Korruptsiyaga oid jinoyat sodir etganligi uchun qidiruvda bo‘lgan:

• bitta shaxsning yashiringan joyi haqida xabar berilsa — BHMning 5 baravari;
• ikki yoki undan ortiq shaxsning yashiringan joyi haqida bir vaqtda xabar berilsa — BHMning 7 baravari miqdorida mukofot beriladi.

Bir nechta huquqbuzarlik haqida xabar berilsa

Shaxs:

• ikki yoki undan ortiq korruptsiyaga oid ma’muriy huquqbuzarlik haqida xabar bersa — BHMning 4 baravari;
• turli og‘irlikdagi ikki yoki undan ortiq korruptsiyaga oid jinoyat haqida xabar bersa — og‘irroq jinoyat tasnifi bo‘yicha bir marta;
• bir xil tasnifdagi ikki yoki undan ortiq jinoyat haqida xabar bersa — bir marta rag‘batlantiriladi.

Bir huquqbuzarlik haqida ikki yoki undan ortiq shaxs xabar bergan bo‘lsa, pul mukofoti ular o‘rtasida teng ulushlarda taqsimlanadi.

Tashakkurnoma va esdalik sovg‘a

Korruptsiyaga oid jinoyatni tergov qilish va fosh etish uchun ahamiyatli dalillar haqida xabar bergan yoki tergov hamda tezkor-qidiruv tadbirlariga bevosita ko‘maklashgan shaxs:

• tashakkurnoma;
• yoki esdalik sovg‘a bilan rag‘batlantirilishi mumkin.

Esdalik sovg‘aning qiymati BHMning 2 baravaridan oshmasligi kerak.

Korruptsiyaga qarshi kurashishga munosib hissa qo‘shgan shaxs davlat mukofotiga ham tavsiya etilishi mumkin.

Kimlar rag‘batlantirilmaydi?

Quyidagilar ushbu tartib bo‘yicha rag‘batlantirilmaydi:

• huquqni muhofaza qiluvchi organ xodimi o‘z xizmat vazifasini bajarish doirasida qidiruvdagi shaxsni aniqlaganda;
• korruptsiyaga oid huquqbuzarlikni bevosita sodir etgan shaxs;
• korruptsiyaga oid jinoyat haqida qonunchilikda belgilangan muddatda o‘z ixtiyori bilan arz qilgan shaxs.

Mukofot berish masalasi qachon ko‘rib chiqiladi?

Rag‘batlantirish masalasi:

• sudning ayblov hukmi yoki qarori qonuniy kuchga kirganda;
• jinoyat ishini ayblilik masalasini hal qilmasdan tugatish to‘g‘risidagi qaror tasdiqlanganda yoki sud ajrimi qonuniy kuchga kirganda;
• qidiruvdagi shaxsga nisbatan qidiruvni bekor qilish haqida qaror qabul qilinganda ko‘rib chiqiladi.

Rag‘batlantirishni kim ko‘rib chiqadi?

Rag‘batlantirish masalasi korruptsiyaga qarshi kurashuvchi organlar huzurida tuziladigan maxsus komissiyalar tomonidan ko‘rib chiqiladi.

Korruptsiyaga qarshi kurashuvchi organ asos yuzaga kelgan kundan boshlab 3 ish kuni ichida maxsus komissiyaga taqdimnoma va tegishli hujjatlarni yuboradi.

Maxsus komissiya hujjatlarni olgan kundan boshlab 5 ish kuni ichida ularning to‘liqligi va asosliligini ko‘rib chiqadi.

Hujjatlar to‘liq bo‘lmasa, ular 2 ish kuni ichida qaytariladi.

Mukofot qachon to‘lanadi?

Maxsus komissiyaning qarori taqdimnomani kiritgan organga 3 ish kuni ichida yuboriladi.

Korruptsiyaga qarshi kurashuvchi organ komissiya qarori asosida 1 ish kuni ichida mukofotlash haqida qaror chiqaradi.

Bir martalik pul mukofoti xarajatlar smetasiga o‘zgartirish kiritilganidan keyin 10 ish kuni ichida shaxsning bank hisobvarag‘iga o‘tkaziladi.

Esdalik sovg‘a tegishli buyum xarid qilinganidan keyin 5 ish kuni ichida topshiriladi.

Xabar bergan shaxs himoya qilinadimi?

Korruptsiyaga oid huquqbuzarlik haqida xabar bergan yoki korruptsiyaga qarshi kurashishga ko‘maklashgan shaxs, uning oila a’zolari va yaqin qarindoshlari qonunchilikda belgilangan tartibda himoya qilinadi.

Ularning shaxsiga doir ma’lumotlar maxfiyligi ta’minlanishi kerak.