Qaysi holatlarda sovg‘a olish mumkin?

Davlat fuqarolik xizmatchisi:

• O‘zbekiston hududidan tashqaridagi xizmat safarlarida;
• xalqaro va boshqa rasmiy tadbirlarda;
• O‘zbekiston hududida o‘tkaziladigan xalqaro va boshqa rasmiy tadbirlarda sovg‘a olishi mumkin.

O‘zbekiston hududida xalqaro yoki boshqa rasmiy tadbir bilan bog‘liq bo‘lmagan oddiy xizmat safari vaqtida sovg‘a olish taqiqlanadi.

Sovg‘a qanday talablarga javob berishi kerak?

Davlat fuqarolik xizmatchisi qabul qiladigan sovg‘a:

• qonunchilikda taqiqlanmagan ashyodan iborat bo‘lishi;
• muayyan xalqaro yoki boshqa rasmiy tadbir munosabati bilan ixtiyoriy berilgan bo‘lishi;
• ochiq va oshkora qabul qilinishi;
• davlat organining obro‘siga putur etkazmasligi;
• manfaatlar to‘qnashuvi yoki korruptsiyaviy xavfni keltirib chiqarmasligi;
• xizmatchining xolis qaror qabul qilishiga ta’sir ko‘rsatuvchi majburiyatni yuzaga keltirmasligi kerak.

Ushbu talablarga javob bermaydigan sovg‘a qabul qilinmasligi lozim.

Qanday sovg‘alarni qabul qilish taqiqlanadi?

Davlat fuqarolik xizmatchisiga o‘z xizmat vakolatlarini jismoniy yoki yuridik shaxs manfaati uchun bajarishi yoki bajarmasligi evaziga:

• pul;
• mol-mulk;
• xizmat;
• imtiyoz;
• boshqa moddiy yoki nomoddiy manfaat taklif qilinishi va qabul qilinishi taqiqlanadi.

Davlat fuqarolik xizmatchisi o‘zi yoki boshqa shaxslar uchun sovg‘a berishni so‘rashi yoki talab qilishi ham mumkin emas.

Oila a’zosiga berilgan sovg‘a kimga tegishli hisoblanadi?

Xalqaro yoki boshqa rasmiy tadbir munosabati bilan davlat fuqarolik xizmatchisining oila a’zosiga berilgan sovg‘a davlat fuqarolik xizmatchisining o‘ziga berilgan sovg‘a hisoblanadi.

Bunday sovg‘aga nisbatan ham uni topshirish, baholash va tasarruf etishning umumiy qoidalari qo‘llaniladi.

Sovg‘a qachon va qaerga topshiriladi?

Xalqaro yoki boshqa rasmiy tadbir munosabati bilan olingan sovg‘a tadbirdan qaytgan kundan boshlab 3 ish kuni ichida davlat organining xo‘jalik ishlari bo‘yicha mas’ul bo‘linmasiga topshiriladi.

Sovg‘a bilan birga uning qiymatini tasdiqlovchi chek, kvitantsiya yoki boshqa hujjat mavjud bo‘lsa, ushbu hujjat ham taqdim etiladi.

Sovg‘a topshirilganda:

• topshirish va qabul qilish dalolatnomasi tuziladi;
• sovg‘a Sovg‘alar reestriga kiritiladi;
• dalolatnomaning bir nusxasi davlat fuqarolik xizmatchisiga beriladi.

Sovg‘a topshirilgunga qadar uning butligi va saqlanishi uchun davlat fuqarolik xizmatchisi javobgar bo‘ladi.

Sovg‘aning qiymati qanday aniqlanadi?

Sovg‘aning qiymatini tasdiqlovchi hujjat mavjud bo‘lmasa, uning bozor qiymati mas’ul bo‘linma tomonidan:

• savdo tashkilotlaridagi narxlar;
• internetdagi ma’lumotlar;
• boshqa ochiq manbalar asosida aniqlanadi.

O‘rganish natijalari bo‘yicha sovg‘aning o‘rtacha bozor qiymati belgilanadi va bayonnoma rasmiylashtiriladi.

Sovg‘a xizmatchining o‘zida qolishi mumkinmi?

Agar sovg‘aning qiymati BHMning 4 baravariga teng yoki undan kam bo‘lsa, u davlat fuqarolik xizmatchisiga qaytarib beriladi. Xizmatchi sovg‘ani o‘z xohishiga ko‘ra tasarruf etishi mumkin.

Agar sovg‘aning qiymati BHMning 4 baravaridan ortiq bo‘lsa, u davlat organining balansiga kirim qilinadi va davlat organi ehtiyojlari uchun foydalaniladi.

Qaysi buyumlar sovg‘a sifatida rasmiylashtirilmaydi?

Quyidagilar sovg‘a sifatida rasmiylashtirilmaydi va davlat fuqarolik xizmatchisida qoldiriladi:

• tabiiy gullar;
• donalik shirinliklar;
• taqvimlar;
• bukletlar;
• plastmassali ruchkalar;
• kundaliklar;
• bloknotlar;
• shu kabi oddiy kantselyariya to‘plamlari.

Mehmondo‘stlik taklifini qabul qilish mumkinmi?

Davlat fuqarolik xizmatchisi xalqaro yoki boshqa rasmiy tadbir munosabati bilan mehmondo‘stlik belgisi sifatida bildirilgan:

• nonushta;
• kofe-breyk;
• tushlik;
• kechki ovqat;
• madaniy yoki kontsert-tomosha tadbiriga taklifni

qabul qilishi mumkin.

Agar taklifning beg‘arazligiga yoki uni qabul qilish qonuniyligiga shubha tug‘ilsa, xizmatchi taklifni darhol rad etishi va bu haqda davlat organining korruptsiyaga qarshi ichki nazorat bo‘linmasini xabardor qilishi lozim.

Tartib kimlar uchun majburiy?

Sovg‘alarni qabul qilish, topshirish, baholash va tasarruf etish bo‘yicha ushbu talablar barcha davlat fuqarolik xizmatchilari uchun majburiy.

Mazkur talablarni buzgan shaxs qonunchilikda belgilangan tartibda javobgar bo‘ladi.