Xorijda olingan ilmiy daraja hujjatini O‘zbekistonda qanday tan olish mumkin?

Kim murojaat qilishi mumkin?

Davlat xizmatidan:

O‘zbekiston Respublikasi fuqarolari;
O‘zbekistonda doimiy yashab va ishlab turgan chet el fuqarolari;
O‘zbekistonda doimiy yashab va ishlab turgan fuqaroligi bo‘lmagan shaxslar foydalanishi mumkin.

1992-yil 1 yanvargacha berilgan fan doktori va fan nomzodi diplomlari hamda professor, dotsent va katta ilmiy xodim attestatlariga nisbatan Reglamentda maxsus qoidalar belgilangan.

Qaerga murojaat qilinadi?

Talabgor:

Davlat xizmatlari markaziga shaxsan;
yoki Yagona interaktiv davlat xizmatlari portali orqali elektron shaklda murojaat qiladi.

Hujjatlarni tan olish bo‘yicha vakolatli organ — Oliy ta’lim, fan va innovatsiyalar vazirligi huzuridagi Oliy attestatsiya komissiyasi.

Qanday hujjatlar talab qilinadi?

So‘rovnomaga:

ilmiy daraja olganlik to‘g‘risidagi hujjatning notarial tasdiqlangan nusxasi;
dissertatsiya nusxasi;
mavjud bo‘lsa, dissertatsiya avtoreferati ilova qilinadi.

PhD yoki unga tenglashtirilgan xorijiy ilmiy daraja hujjati uchun qonunchilikda nazarda tutilgan holda davlat tiliga notarial tartibda tasdiqlangan tarjima taqdim etiladi. Reglamentda ko‘rsatilmagan boshqa ma’lumot yoki hujjatlarni talab qilish taqiqlangan.

Qaysi hujjatlar ekspertizasiz tan olinadi?

Ayrim hollarda xorijda olingan ilmiy daraja hujjati ilmiy ekspertizasiz to‘g‘ridan-to‘g‘ri tan olinadi. Jumladan:

O‘zbekistonning xalqaro bitimlari yoki Prezident va Hukumat hujjatlarida nazarda tutilgan maqsadli tayyorlash asosida olingan ilmiy darajalar;
oliy ta’limdan keyingi ta’limning bir pog‘onali tizimi amal qiladigan davlatlarda, vazirlik tasdiqlaydigan xalqaro reytinglarda tegishli fan tarmog‘i bo‘yicha birinchi 300 talikka kirgan oliy ta’lim tashkilotida reyting yiliga muvofiq olingan PhD yoki DSc darajalari;
vazirlik va idoralar yo‘llanmasi yoki «El-yurt umidi» jamg‘armasi orqali maqsadli tayyorgarlik o‘tilgan muassasalar bergan ilmiy daraja hujjatlari.

To‘g‘ridan-to‘g‘ri tan olish masalasi vakolatli organda 1 ish kuni ichida ko‘rib chiqiladi va keyin Rayosatning navbatdagi majlisida qaror qabul qilinadi. Ilmiy ekspertiza talab qilinsa, ekspert kengashi xulosasi 20 kun ichida tayyorlanadi.

Xizmat qancha turadi?

Umumiy tartibda davlat xizmati uchun 1 BHM yig‘im undiriladi.

Bunda:

YaIDXP orqali murojaat qilinsa — belgilangan yig‘imning 90 foizi;
Ijtimoiy reestrga kiritilgan shaxslar hamda I va II guruh nogironligi bo‘lgan shaxslar uchun — asosiy yig‘imga 50 foiz chegirma qo‘llanadi.

Hujjat to‘g‘ridan-to‘g‘ri tan olinadigan holatlarda yig‘im undirilmaydi.

Qarordan norozi bo‘lsa nima qilish mumkin?

Talabgor hujjatni tan olish bo‘yicha qarordan norozi bo‘lsa, qaror qabul qilingan kundan boshlab 2 oy ichida:

YaIDXP orqali vakolatli organga apellyatsiya;
yoki sudga murojaat qilishi mumkin.

Ma’muriy apellyatsiya 1 oy ichida ko‘rib chiqiladi.

Eslatma: 2000-yilgi eski nostrifikatsiya tartibi bo‘yicha ish beruvchining xati, mehnat daftarchasidan ko‘chirma va boshqa ko‘p sonli hujjatlarni talab qilish amaldagi yangi Reglamentga mos emas. Yangi tartibda Reglamentda ko‘rsatilmagan qo‘shimcha hujjatlarni talab qilish taqiqlangan.

Normativ hujjatlar

O‘zbekiston Respublikasi Vazirlar Mahkamasining qarori, 09.04.2026-yildagi 161-son