Dori vositalari bilan ta’minlash bo‘yicha imtiyozlar

Kimlar imtiyozli dori vositalarini olish huquqiga ega?

Ambulatoriyada davolanish vaqtida quyidagi shaxslar dori vositalari bilan imtiyozli ta’minlanish huquqiga ega:

onkologik kasalliklarga chalinganlar;
sil kasalligiga chalinganlar;
moxov kasalligiga chalinganlar;
endokrinologik kasalliklarga, jumladan qandli va qandsiz diabetga chalinganlar;
ruhiy kasalliklarga chalinganlar;
OIV infektsiyasini yuqtirganlar;
yurak klapanini protezlash yoki organlarni ko‘chirish bo‘yicha operatsiya qilingan shaxslar;
dasturli gemodializ oluvchi bemorlar;
o‘zgalar parvarishiga muhtoj yolg‘iz pensionerlar;
1941–1945-yillardagi urush oqibatida nogiron bo‘lgan shaxslar va urush qatnashchilari, shuningdek, ularga tenglashtirilgan shaxslar;
1941–1945-yillardagi urush mehnat fronti qatnashchilari;
Chernobilь AESi falokatini tugatishda ishtirok etgan shaxslar jumlasiga kiruvchi nogironligi bo‘lgan shaxslar;
baynalmilalchi jangchilar;
harbiy xizmatni yadro poligonlarida va boshqa radiatsiya-yadro ob’ektlarida o‘tagan pensiya yoshidagi shaxslar.

Dori vositalari qanday beriladi?

Imtiyozli dori vositalari bemor ambulatoriya tartibida davolanayotgan davlat ambulatoriya-poliklinika muassasasida davolovchi vrachning tayinlovi bo‘yicha bepul beriladi.

Dori vositalari:

ambulatoriya-poliklinika muassasasi orqali;
yoki davolovchi vrach yozgan imtiyozli retsept asosida dorixona orqali beriladi.

Talab etiladigan dori vositasi tibbiyot muassasasida mavjud bo‘lmasa, davolovchi vrach uni dorixonadan imtiyozli olish uchun retsept yozadi.

Imtiyozli retsept qanday olinadi?

Bemor, uning ota-onasi, o‘rnini bosuvchi shaxs yoki qarindoshi retsept olish uchun bemor hisobda turgan yoki tibbiy xizmat ko‘rsatish uchun biriktirilgan ambulatoriya-poliklinika muassasasiga murojaat qiladi.

Murojaat qilishda dori vositalari bilan imtiyozli ta’minlanish huquqini tasdiqlovchi hujjat taqdim etiladi.

Retsept:

tibbiy ko‘rsatmalar asosida;
bir davolash kursidan ortiq bo‘lmagan miqdorda yoziladi;
berilgan kundan boshlab 1 oy davomida amal qiladi.

Dori vositalari kimga beriladi?

Dori vositalari mas’ul shaxs tomonidan maxsus jurnalga imzo qo‘ydirilgan holda bemorga beriladi.

Voyaga etmagan bemorlarga mo‘ljallangan dori vositalari ularning ota-onasi yoki o‘rnini bosuvchi shaxslarga beriladi. Ayrim hollarda voyaga etgan bemorning sog‘lig‘iga qarab, dori vositalari uning qarindoshlariga ham berilishi mumkin.

Dorixonada belgilangan dori bo‘lmasa

Dorixonada retseptda savdo nomi bilan ko‘rsatilgan dori vositasi mavjud bo‘lmasa, uni boshqa savdo nomidagi, ta’sir etuvchi moddasi bir xil bo‘lgan dori vositasiga almashtirish mumkin.

Bunday almashtirish:

yangi retsept asosida;
ambulatoriya-poliklinika muassasasi rahbari yoki uning o‘rinbosari bilan kelishilgan holda amalga oshiriladi.

Dorixona xodimi retseptning orqa tomoniga dori mavjud emasligi haqida belgi qo‘yadi va retseptni bemorga qaytaradi.

Agar dorining retseptda ko‘rsatilgan to‘liq miqdori mavjud bo‘lmasa, bemorga mavjud miqdordagi dori beriladi va bu haqda retseptda belgi qo‘yiladi.

Qaysi dorilar imtiyozli beriladi?

Imtiyoz faqat ambulatoriyada davolanishda imtiyozli ta’minlash uchun tasdiqlangan ro‘yxatga kiritilgan dori vositalariga tatbiq etiladi.

Dorixonadan beriladigan dori vositasining miqdori va dozasi retseptda ko‘rsatilgan miqdor va dozaga muvofiq bo‘lishi kerak.

Normativ hujjatlar

O‘zbekiston Respublikasi Vazirlar Mahkamasining 2013-yil 22 iyuldagi 204-son qarori

Ambulatoriyada davolanishda imtiyozli ta’minlash uchun mo‘ljallangan dori vositalari ro‘yxati