Respublika ixtisoslashtirilgan tibbiyot markazlarida bepul davolanish uchun order olish

Kimlarga bepul order beriladi?

Respublika ixtisoslashtirilgan tibbiyot markazlarida davlat byudjeti mablag‘lari hisobidan bepul davolanish huquqi qonunchilikda belgilangan imtiyozli toifadagi shaxslarga beriladi.

Order, asosan, boshqa tibbiyot muassasalarida ko‘rsatish imkoniyati bo‘lmagan ixtisoslashtirilgan, yuqori texnologiyali va qimmat turadigan tibbiy yordam olish uchun ajratiladi.

Imtiyozli toifaga kirish shaxsga avtomatik ravishda bepul davolanish huquqini bermaydi. Buning uchun tibbiy ko‘rsatma va vrach-tanlash komissiyasining xulosasi bo‘lishi kerak.

Bepul tibbiy xizmatlar uchun kvotalar

Sog‘liqni saqlash vazirligi tomonidan har chorakda tibbiyot markazlarining o‘rinlar fondi, o‘rinlarning aylanishi va poliklinikalarning bemor qabul qilish quvvatidan kelib chiqib quyidagi miqdorlarda kvotalar belgilanadi:

Respublika ixtisoslashtirilgan tibbiyot markazlari uchun — 20 foizgacha;
Respublika ixtisoslashtirilgan akusherlik va ginekologiya ilmiy-amaliy tibbiyot markazi uchun — 20 foizgacha;
Respublika ixtisoslashtirilgan endokrinologiya ilmiy-amaliy tibbiyot markazi hamda Respublika ixtisoslashtirilgan dermatologiya va venerologiya ilmiy-amaliy tibbiyot markazi uchun — 30 foizgacha;
Respublika ixtisoslashtirilgan terapiya va tibbiy reabilitatsiya ilmiy-amaliy tibbiyot markazida katta yoshdagilar bo‘limlari uchun — 20 foizgacha, bolalar bo‘limlari uchun — 100 foizgacha;
Respublika ixtisoslashtirilgan pediatriya ilmiy-amaliy tibbiyot markazi hamda Respublika ixtisoslashtirilgan ftiziatriya va pulьmonologiya ilmiy-amaliy tibbiyot markazi uchun — 100 foizgacha.

Kvotalar hududlar bo‘yicha Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqaruv organlarining buyurtmanomalari asosida taqsimlanadi.

Order kimning xulosasi asosida beriladi?

Bepul davolanish uchun order quyidagi organlar huzuridagi vrach-tanlash komissiyasining xulosasi asosida beriladi:

Sog‘liqni saqlash vazirligi;
Qoraqalpog‘iston Respublikasi Sog‘liqni saqlash vazirligi;
Toshkent shahar sog‘liqni saqlash bosh boshqarmasi;
viloyatlar sog‘liqni saqlash boshqarmalari.

Qanday hujjatlar talab etiladi?

Vrach-tanlash komissiyasi order berish masalasini tegishli tibbiy hujjatlar mavjud bo‘lgan taqdirda ko‘rib chiqadi.

Jumladan, bemorning respublika ixtisoslashtirilgan tibbiyot markazida davolanishi maqsadga muvofiqligi haqida hududiy davolash-profilaktika muassasasining xulosasi talab qilinadi.

Mazkur xulosa birlamchi tibbiy yordam muassasasining yo‘llanmasi asosida rasmiylashtiriladi.

Muhim shart

Bepul davolanish faqat belgilangan kvota doirasida, imtiyozli toifaga kiruvchi shaxsga va tegishli tartibda berilgan order asosida amalga oshiriladi.

Ordersiz murojaat qilinganda yoki shaxs imtiyozli toifaga kirmaganda tibbiy xizmatlar, qoida tariqasida, pulli asosda ko‘rsatiladi.

Normativ hujjatlar

O‘zbekiston Respublikasi Prezidentining 2003-yil 26-fevraldagi PF-3214-son Farmoni

O‘zbekiston Respublikasi Vazirlar Mahkamasining 2004-yil 8-iyundagi 264-son qarori