Ortiqcha to‘langan soliq nima?

Ortiqcha to‘langan soliq — soliq to‘lovchi byudjetga amalda to‘lashi lozim bo‘lgan summadan ko‘proq to‘lagan holatda yuzaga keladigan farq.

Ortiqcha to‘lov quyidagi sabablarga ko‘ra paydo bo‘lishi mumkin:

• soliqni takroran to‘lash;
• to‘lov summasini xato ko‘rsatish;
• soliq qayta hisoblanishi;
• imtiyozning keyinroq hisobga olinishi;
• aniqlashtirilgan deklaratsiya yoki soliq hisoboti taqdim etilishi;
• noto‘g‘ri rekvizitlar bo‘yicha to‘lov amalga oshirilishi.

Muhim: ortiqcha to‘langan soliq va soliq organi tomonidan ortiqcha undirilgan soliq bir xil tushuncha emas. Ularni hisobga olish va qaytarishda ayrim farqlar mavjud.

Ortiqcha summa avval qaerga yo‘naltiriladi?

Agar soliq to‘lovchining soliq qarzi mavjud bo‘lsa, ortiqcha to‘langan summa quyidagi ketma-ketlikda hisobga olinadi:

1. shu soliq turi bo‘yicha penya qarziga;
2. boshqa soliqlar va ular bo‘yicha penya qarziga;
3. soliqqa oid huquqbuzarliklar uchun jarimalarga.

Soliq qarzini qoplash uchun hisobga olish soliq organi tomonidan mustaqil ravishda amalga oshiriladi.

Soliq qarzi bo‘lmasa nima bo‘ladi?

Soliq to‘lovchining qarzi bo‘lmasa, ortiqcha to‘langan summa:

• soliq to‘lovchiga qaytarilishi;
• shu soliq turi bo‘yicha kelgusi to‘lovlarga o‘tkazilishi;
• soliq to‘lovchining arizasiga ko‘ra boshqa soliqlar bo‘yicha kelgusi to‘lovlarga hisobga olinishi mumkin.

Boshqa soliqlar bo‘yicha kelgusi to‘lovlarga o‘tkazish soliq to‘lovchining yozma yoki elektron arizasi asosida soliq organi tomonidan 3 kun ichida amalga oshiriladi.

Hisobga olish haqida qaror qachon qabul qilinadi?

Ortiqcha to‘langan summani soliq qarzini qoplash hisobiga o‘tkazish to‘g‘risidagi qaror soliq organi tomonidan:

• ortiqcha to‘lov aniqlangan kundan;
• soliq organi va soliq to‘lovchi o‘rtasidagi solishtirish dalolatnomasi imzolangan kundan;
• yoki sud qarori qonuniy kuchga kirgan kundan e’tiboran 10 kun ichida qabul qilinadi.

Soliq to‘lovchi hisobga olish haqida alohida ariza bersa, qaror ariza olingan kundan boshlab 10 kun ichida qabul qilinadi.

Ortiqcha to‘langan soliqni qaytarish mumkinmi?

Ha. Soliq to‘lovchi ortiqcha to‘langan summani to‘liq yoki qisman qaytarish haqida soliq organiga ariza berishi mumkin.

Qaytarishdan avval soliq to‘lovchining mavjud soliq qarzlari tekshiriladi va ortiqcha summa, avvalo, ushbu qarzlarni qoplashga yo‘naltiriladi.

Qarz mavjud bo‘lmasa, ortiqcha to‘langan summa ariza olingan kundan e’tiboran, qoida tariqasida, 15 kun ichida qaytariladi.

E’tibor bering: qo‘shilgan qiymat solig‘ini qoplash yoki qaytarish uchun alohida tartib belgilangan.

Ariza berish muddati qancha?

Ortiqcha to‘langan soliqni hisobga olish yoki qaytarish haqidagi ariza ortiqcha summa to‘langan kundan e’tiboran 3 yil ichida berilishi mumkin.

Muhim: avvalgi materialdagi 5 yillik muddat amalda qo‘llanilmaydi.

Ortiqcha undirilgan soliq nima?

Ortiqcha undirilgan soliq — soliq organining qonunga xilof qarori yoki harakati natijasida soliq to‘lovchidan ortiqcha undirilgan summa.

Ortiqcha undirilgan summani hisobga olish yoki qaytarish haqidagi ariza:

• ortiqcha undirilgani soliq to‘lovchiga ma’lum bo‘lgan kundan;
• yoki tegishli sud qarori qonuniy kuchga kirgan kundan

e’tiboran 3 yil ichida berilishi mumkin.

Ortiqcha undirilgan summaga foiz to‘lanadimi?

Ortiqcha undirilgan summa belgilangan shartlarda unga hisoblangan foizlar bilan birga qaytariladi.

Foiz olish uchun soliq to‘lovchi ortiqcha undirish haqida bilgan yoki sud qarori qonuniy kuchga kirgan kundan e’tiboran 30 kun ichida murojaat qilishi lozim.

Foizlar:

• ortiqcha summa undirilgan kundan keyingi kundan;
• summa amalda hisobga olingan yoki qaytarilgan kungacha hisoblanadi.

Foiz stavkasi Markaziy bankning tegishli davrda amal qilgan qayta moliyalashtirish stavkasiga teng miqdorda belgilanadi.

Qaytarish kechiktirilsa nima bo‘ladi?

Ortiqcha to‘langan summa belgilangan muddatda qaytarilmasa, muddatida qaytarilmagan summaga har bir kechiktirilgan kalendarь kun uchun foiz hisoblanadi.

Soliq organi hisobga olish yoki qaytarishni rad etsa, qabul qilingan qaror haqida soliq to‘lovchiga 3 kun ichida xabar berishi kerak.

Rad etish qarori ustidan yuqori turuvchi soliq organiga yoki sudga shikoyat qilish mumkin.

Ariza qanday beriladi?

Arizani:

• soliq organiga shaxsan;
• soliq to‘lovchining shaxsiy kabineti;
• soliq organlarining elektron xizmatlari orqali taqdim etish mumkin.

Arizada quyidagilar ko‘rsatiladi:

• soliq turi;
• ortiqcha to‘langan summa;
• to‘lov sanasi va rekvizitlari;
• summani qaytarish yoki hisobga olish talabi;
• qaytarish uchun bank rekvizitlari;
• boshqa soliqqa o‘tkazilsa, tegishli soliq turi.

Arizaga zaruratga qarab to‘lov hujjati, solishtirish dalolatnomasi, aniqlashtirilgan deklaratsiya yoki sud qarori ilova qilinadi.

Tavsiya: ariza berishdan oldin soliq to‘lovchining shaxsiy kabineti orqali hisob-kitoblarni tekshirish va zarur bo‘lsa soliq organi bilan o‘zaro solishtirish dalolatnomasini rasmiylashtirish maqsadga muvofiq.