Ўзбекистон фуқаролигига соддалаштирилган тартибда қабул қилиш

Ўзбекистон фуқаролигини олиш: янги қоидалар | NORMA.UZ

Кимлар мурожаат қилиши мумкин?

18 ёшга тўлган, муомала лаёқатига эга чет давлат фуқароси ёки фуқаролиги бўлмаган ватандош қуйидаги шартларда Ўзбекистон фуқаролигига соддалаштирилган тартибда қабул қилиниши мумкин:

Ўзбекистонда яшайдиган ва Ўзбекистон фуқароси бўлган, тўғри туташган камида битта аждоди мавжуд бўлса;
тирикчиликнинг қонуний манбаига эга бўлса;
Конституцияга риоя этиш мажбуриятини олса;
давлат тилини мулоқот учун зарур даражада билса.

Юқори илмий, техник, маданий ёки спорт ютуқларига эга ёхуд мамлакат манфаатларига мос касб ва малакага эга ватандошга қариндошлик шарти қўлланилмаслиги мумкин.

Қандай ҳужжатлар тақдим этилади?

Асосий ҳужжатлар:

илтимоснома ва сўровнома;
шахсни тасдиқловчи ҳужжат;
туғилганлик ва зарурат бўлса никоҳ ҳақидаги гувоҳнома;
Ўзбекистон фуқароси бўлган аждодининг ID-картаси ёки паспорти;
қонуний даромад манбаини тасдиқловчи ҳужжат;
судланганлик ҳолати ҳақидаги маълумот;
давлат божи ёки консуллик йиғими тўланганлиги ҳақидаги ҳужжат.

Бола ҳам илтимосномага киритилса, унинг ҳужжатлари тақдим этилади. 14 ёшдан 18 ёшгача бўлган боланинг ёзма розилиги талаб қилинади.

Давлат тилини билиш шарти кимларга қўлланилмайди?

Ушбу шарт:

Ўзбекистонда камида умумий ўрта таълим олганларга;
60 ёшга тўлганларга;
муомалага лаёқатсиз ёки лаёқати чекланган шахсларга;
I гуруҳ ногиронлиги бўлган шахсларга татбиқ этилмайди.

Мурожаат қаерга берилади?

Ўзбекистонда доимий яшовчи шахс ҳужжатларни яшаш жойидаги ички ишлар органига, хорижда яшовчи шахс эса Ўзбекистоннинг консуллик муассасасига тақдим этади.

Материаллар Президент ҳузуридаги Фуқаролик масалалари комиссияси томонидан кўриб чиқилиб, Президентга таклиф киритилади.

Муҳим: ижобий қарор қабул қилинса, ариза берувчига чет давлат фуқаролигидан чиқиш учун 1 йил амал қиладиган кафолат хати берилади. Унинг муддати яна 1 йилга узайтирилиши мумкин.

Чет давлат фуқаролигидан чиққанлик ҳақидаги ҳужжат тақдим этилгандан кейин Ўзбекистон фуқаролигига қабул қилиш Президент фармони билан расмийлаштирилади.

Норматив ҳужжатлар

«Ўзбекистон Республикасининг фуқаролиги тўғрисида»ги Қонун

Ўзбекистон Республикаси Президентининг 2021 йил 10 мартдаги ПФ-6185-сон Фармони